Ua taoto nei tapenaga ole a saoasaoa ai fesootaiga televavave faaonapo nei i Samoa pe a maea ona faataoto mai le laina fou o fesootaiga i lalo ole sami ile tausaga fou lea ua galulue ai le kamupani ole Tui Samoa Marine Cable.
Ole talitonuga ole toatele afai ole a sili ona lelei ma saoasaoa ai fesootaiga mai Samoa agai atu i tulu‘iga eseese ole lalolagi, ole a a saoasaoa ai ma le iloa o fanau ile faaaogāina o fesootaiga televavave i luga o telefoni feaveai.
Ole mau a nisi e ao ile Malo ona silasila toto‘a i le tulaga lea ina ia faataoto nei loa ni tulafono e puipuimalu ai le soona faaaogā e fanau o fesootaiga nei.
Na tuusa‘o le fesili ile Palemia i sona finagalo ma se fuafuaga ale Malo, auā ua tele solitulafono ua aliali ma tutupu e aafia ai fanau ona ole faaaogāina o fesootaiga televavave i luga o telefoni feaveai.
“Ole mea moni lava e lē faapea o mea uma lava ua fesili mai ile Malo, e lē tau faatulafonoina foi galuega ma gaioiga uma, ae ole mataupu ua fesili mai ai ole faatamala tele o mātua le soona tuufau o a latou fanau e faaaogā telefoni nei ae ole latou pitolaau ma le tiute lena”.
E lē tatau lava ona ave ni telefoni i tamaiti auā ua tatou iloa e na‘o tamaiti loa le fale pe alu ile potu taotooto ai ma fai ai ana faiga ile telefoni ole mea sili lena ona tatau ona faaeteete iai mātua”.
Faaalia ele afioga ile Palemia susuga Tuilaepa L Sailele Malielegaoi nisi o mea na tutupu e mafua i telefoni nei e pei ose faifeau na lafo lana feau tusitusia poo se text ise faletua ose isi faifeau ae sa lilo ile faifeau e ana le toalua oloo nonofo faatasi, o lea e fesootai lona faletua ma isi ona uso a faifeau ile telefoni feaveai.
O fesootaiga foi nei ua faaalia ele Palemia ua masesei ai ulugalii, ua vevesi ai le lotoifale o faigauo, malepe ai se aiga ona ua leai se faautautaga tatau e faaaogā tatau ai ae ua soona faaaogā sese.
Ole faalauiloaina ole amatalia o galuega ole faataotoina ole laina fou o fesootaiga ale kamupani ole Tui Samoa Marine Cable ile nofoaga i Vaivase-tai ile vaega oloo iai le Kolisi o Samoa, na faaalia ai ele Minisita o Fesootaiga ma Faamatalaga Faatekonolosi le afioga Afamasaga Rico Tupai, ole faamuamua lea ale Malo ile faatinoina o lea galuega tele ole vaavaai ise faiga e puipuia ai le oo atu o tupulaga talavou ma fanau ale atunuu i fesootaiga e lē talafeagai ma latou, pe a oo ina amata faaaogā le laina fou o fesootaiga televavave faaonapo nei.
E manino ile finagalo ole minisita e lē o toe nofonofo le Malo ile saili o vaipanoa uma e mafai ona poloka ai le oo atu o fanau i fesootaiga eseese ile lalolagi e palalasi atu ai ini faiga solitulafono ma aafia ai o latou olaga ini faaletonu ogaoga.
