Faaalia e le alii Palemia i lana fonotaga ma tusitala i le faaiuga o le vaiaso, o le matuā tele lava o tusi ua oo atu e talosagaina ai le alii Palemia ina ia faamatuu atu nisi o aseta a le malo ia na maua mai i le fono a Malo laiti Tauatiae a le Lalolagi le SIDS lea faatoa mae‘a atu.
O lea la ua tuu atu e le alii Palemia i komiti eseese o aseta nei poo le ā so latou finagalo i lenei mau talosaga.
Ta‘ua e le Alii Palemia, o le tele o talosaga e sau mai i aoga, ua talosagaina le alii Palemia pe mafai ona avatu ni pasi faamalu mo aoga nei e felauai ai le fanau aoga. O le faamatalaga a le Alii Palemia, e iai isi faatasiga tetele o loo alo atu Samoa e talimalo ai i le faaiuga o le tausaga nei ma le amataga o le tausaga fou.
O le mau a le Palemia e moomia taavale nei auā o le fono o le faaiuga o le tausaga e talimalo ai Samoa i sui usufono e tusa ma le to‘a afe (1000) ae o le amataga o le tausaga fou e talimalo atu i le silia ma le to‘a afe foi i taaloga a le Tupulaga Talavou a Malo o le Taupulega. O ia taligamalo uma e moomia ai lava taavale nei ma nofoaga e faamautu ai nei tagata.
O lea la ua tuu atu e le taitai o le Malo mo se finagalo a komiti nei o le SIDS pe o le ā tonu se faatatau e mafai ona faatino ia i latou ua talosaga mai mo ni taavale. E lei oo le fuafuaga a le alii Palemia i laulau ma nofoa o fale fono pe o le a ave ofisa o le malo pe leai foi.
Ona pau le tulaga mautinoa o lea o le a faaaogā e le Palemene i ana fonotaga le maota fono tele ona o lea o le a fai galuega e toe fausia ai se Maota Fono i Mulinuu ma ua mae‘a ona faalauiloa lea tulaga ma o lona uiga e ono faaaogā ai meaafale o loo i totonu o lea maota fono tele aemaise o le ofisa o le Fono (Legislative) lea o le a faapea ona see atu i lea nofoaga.
