E to‘a 18 faafeagaiga ma o latou faletua na faauuina i le Aso Toonai na tea nei i le laumua o le Ekalesia Faapotopotoga Kerisiano Samoa i Malua.
O i latou ia ua mafai ona laasia le isi laasaga o tiute tauavae o le valaauina e ala i le galuega faafaifeau.
O le taimi lava lenei o le tausaga e faia ai le faauuga lenei mo faifeau e faauuina ai e ala lea i tofiga e faatautaia ai soo se sauniga. O le faauuga lenei ua mafai ai loa ona faatautaia e i latou nei sauniga faapitoa e pei o faaipoipoga, maliu, papatisoga atoa ai ma le faamanatuga.
O le isi laasaga lenei o le faavae o le Ekalesia, e ese ona faauu mai pe a mae‘a tausaga e 4 e aoga ai i le kolisi faafaifeau i Malua, mulimuli ane faatoa faauuina e ala lea i tofiga o le Ekalesia.
E toatele lava o aoao faauuina e agai loa e tausi nuu ona tuu lea i ai o le tausaga atoa e faatino ai galuega faatoa faauu mai ai loa lea e avea ma faifeau e faatinoa galuega nei e pei ona ta‘ua.
O le avea ai ma faifeau i le Ekalesia na ta‘ua e le taitai o le sauniga, le faifeau toeaina Faatonu, Rev. Kerisiano Soti, o se faaeaea lea mo aiga ma nuu aemaise o le Ekalesia.
O nisi o le aufaauu ua tausi nuu i nisi o afioaga, ma o le laasia ai o lenei laasaga na ta‘ua e nisi o se miti ua taunuu.
O le faauuga na faatautaia a o feagai ai le Ekalesia Faapotopotoga Kerisiano Samoa ma lana usugafono o lenei tausaga.
Lisi o Faifeau & Faletua ua faauu mai Malua
Andrew & Faleupolu Laufiso – Faleata
Faataualofa & Miriama Taefu – Faasaleleaga
Fala & Ane Tusa Nila – Falealili Sisifo
Falani & Paono Tofilau – Niusauelese
Fetuliaina & Fusi Pama – Aukilani
Iakopo & Pele Manutai – Manukau
Isamaeli & Aliitasi Aula‘i – Lotofaga/Lepa
Mofate & Aliitasi Fuimaono – Niusauelese
Pasefika & Talalelei Maiava – Niusauelese
Pati & Aiga Chricton – Faleata
Reupena & Fuarosa Maulolo – Kolisi o Malua
Ropati & Nuutofi Toleafoa – Faasaleleaga
Seilala & Agape Luamanuvae – Faleata
Seti & Vaialisi Seti – Aana
Sili & Logola Mo‘a – Kuiniselani
Tafatolu & Merina Lelevaga – Faleata
Tavita & Cynthia Faletagaloa – Amerika
Elisaia & Sauiluma Tagiilima – Amerika
