E matuā umi se solo na molimauina ai le polosesio a le Ekalesia Katoliko mai i le matagaluega o Toamua seia oo i le matagaluega i Leulumoega.
O le latou sao i le faamanatu ai i lenei tausaga o le atoaga o le 170 o tausaga talu ona faavae le Ekalesia Katoliko Roma i totonu o Samoa. O le solo tele na taunuu i Tofamamao ma o iina na faia ai se sauniga lotu tele na faapea ona auai ai le Sui Akiepikopo o le Ekalesia Katoliko i Samoa ma isi taitai o le ekalesia.
O se sauniga lotu na faapea ona saunoa ai le afioga i le taitai o le Fono a Ekalesia Soofaatasi i Samoa, le afioga Kasiano Leaupepe ma faamatala ai le talaaga o le taunuuga o le lotu i le atunuu. O le Vikariatu i Upolu Sisifo lea e aofia ai aulotu poo matagaluega e 11 a lea ekalesia na auai uma i lenei mafutaga na faatautaia mo aso e lua o le Aso Tofi ma le Aso Faraile na tea nei.
O le Ekalesia na taunuu i Lealatele i Samalaeulu Savaii i le aso 8 o Setema i le tausaga e 1945. O le taeao lava lea i Malaeola ma Nafoaga. Na ta‘ua e le Monesiolo ia Etuale Etuale le sui Akiepikopo ua mae‘a tapenapenaga a Vikariatu Sasae faapea le Vikariatu tutotonu mo lea faamoemoe, o i latou ia ua taualuga ai tapenapenaga a Upolu atoa. Sa faapiota lava lenei faamoemoe mo le tupulaga talavou a le Ekalesia ina ia toe fafagu mai le talatuu o le taunuu mai ai o le Ekalesia ina ia nofosilafia fanau o le Ekalesia i le talaaga a le Lotu Katoliko.
O le isi vaega tāua o lenei tausaga faamanatu, o le taunuu mai ai o Pope Paulo VI i Samoa i le tausaga e 1970 ma faatu ai le kolisi a le Ekalesia i Leulumoega ma faaigoa ai o le Kolisi o Pope Paulo VI, e fai lea ma faailoga o le asiasi mai o le tamā paia i Samoa nei.
Na ta‘ua e sui o le Ekalesia le tele o ni faafitauli na feagai ai ma faifeau Farani na aumaia le Ekalesia ae peitai lea na talia e Tuala Taetafe ma mafai ai ona faatu i totonu o Samoa.
E fā vikariatu ua vaevaeina ai le Ekalesia ma ua mae‘a tapenapenaga a vikariatu i Upolu nei ae o le masina o Setema ua faamoemoe ai e faamanatu ai e Savaii lea faamoemoe ona fai lea o le tuufaatasiga mulimuli i le masina o Tesema i le tausaga nei e faamanatu ai lenei laasaga tele o le talafaasolopito o le Ekalesia Katoliko i Samoa.
O le faafetai ua sii i le Matai Sili ona o le tumau o le agaga tapuai o le ekalesia lea e tusa ma le to‘a 25,000 le aofai o ona sui i totonu lava o Samoa, e tusa lea ma le 20 pasene o le faitau aofai o Samoa atoa.
