15 ulufale i Malua, suipi ma le sui faasalalau leitio i Niu Sila

O le mae‘a o le Lotu a Tamaiti i tausaga taitasi e faailoa ai le taunuuga o le suega ulufale i le Kolisi Faafaifeau i Malua mo i latou ua pasi ma talia. O le Aso Gafua ananafi le aso malolo o le Lotu a Tamaiti na faailoa ai e le Pule o le Kolisi Faafaifeau, le susuga Afereti Uili suafa o alii e to‘a sefululima ua talia i Malua mo le tauaveina o aoaoga mo le avea ma faifeau mo le fā tausaga.

O i latou ua pasi i le suega ulufale a Malua ua aofia ai ma se tasi o tamafanau ua leva tausaga o galue mo le ualesi faasalalau poo le leitio o le Radio Samoa le susuga Sunita Nua, o se alo e faasino i le afioaga o Solosolo. O se tasi foi o sui ua faamanuiaina o se tamafanau foi sa galue i le vaega o maketi i le itu tau faasalalauga a le leitio o le 2AP i tausaga ua mavae, ae o se alo e faasino i le susuga i le faafeagaiga o Eti Tamati ma le faletua o Kuinimeri, le susuga Bismark Tamati, o loo lauiloa nei i le atunuu lana pisinisi o le Sooula lea e faatau ai pusaapa ma manu papalagi ma isi lava oloa e manaomia i faalavelave tetele e pei o umusaga, faaipoipoga ma maliu.

O suafa o le toa sefululima ua faailoa nei e aofia ai:
Arnold Fautanu; Harry Cowley; Fauena Leilua; Keresoma Seuala; Tau Toleafoa; Sunita Nua; Fiso Lakisa; Charlie Banse; Esera Esera; Elekana Lealiifano; Faalefu Tumutalie; Leuelu Setu; Onosai Nofoaiga; Bismark Tamati; ma Oli Levi.
O le lisi lenei mai le pule o le kolisi faafaifeau e lē o faailoaina ai poo fea pulega ma matagaluega a le ekalesia EFKS o loo galulue ai i latou ua faamanuiaina i le suega ulufale i Malua mo lenei tausaga.

E le pei o nisi o tausaga ua tuanai sa iloa lava pulega ma matagaluega sa galulue ai i latou na pasi ma talia mo Malua. E ui i lea tulaga peitai o le suega lenei e faatalitali uma i ai le toatele ona o le fia silafia poo ai ua pasi ma o le a ulufale e avea ma faifeau pe a faaiuina ma le manuia aoaoga i le aotauina mo le galuega o le talalelei.

O le tasi foi lea o faamoemoega aupito maualuga i lagona o tagata o se nuu ma se aiga pe a talia se tasi o o latou alo ma fanau i Malua, auā o se galuega e faamemelo uma i ai lagona o le aiga ma le nuu, ona o le mitamita ua iai se isi poo nisi e fai ma o latou sui i le galuega o le avea ma faifeau o le talalelei. O le amataga o le tausaga fou e faia ai tautinoga ona iloa ai lea o le talia atoatoa o i latou ua talia i le Kolisi faafaifeau a le Ekalesia Faapotopotoga Kerisiano Samoa i le tausaga fou 2015.
Le susuga Sunita Nua sa galue muamua i le Radio Samoa ma le 531PI ua aofia i le au pasi e to‘a 15 o le a ulufale i le Kolisi Faafaifeau i Malua - photo Khingchadwick.files.wordpress