O le faaopoopoga lea o se faasalaga ua tuu atu e le Faamasinoga Maualuga faasaga i se alii ua matua iloga le matuiā o ana gaioiga ua faia i ona alo teine.
O le taimi lenei o lea faatoa atoa le uluai tausaga o le faasalaga soloatoa (tusa ma le 10 tausaga) o loo tuli e se alii e 42 tausaga le matua – ona o le maliu ai o sona afafine – o le tama teine a lona toalua.
O se mataupu na faapea ona oo i Ausetalia le talosaga a leoleo i Samoa nei ina ia mafai ai ona maua mea faigaluega i le sailiga o le tino o le teine matua lea.
O le teine lona lua na faapea ona toe tulai ai lea alii – e 14 tausaga le matua ae amata ona faamalosi e lenei alii ma e lua tausaga o faia lea amio matagā ae faatoa ta‘u e le isi foi afafine laititi atu i lo latou tina lea amio a lo latou tamā, ma logo loa leoleo ma amata ai sailiga.
O le tausaga e 2010 na faasala ai lea alii i le moliaga o le fasioti tagata faamoemoeina faatasi ai ma lona toalua, ae o le tausaga foi lena na faaofi ai ma le tagi o le mataupu lenei o le toso teine i le afafine lona lua. E lua moliaga ia na faamaonia i le aso ananafi i luma o le Faamasinoga Maualuga.
O le faamatalaga o lenei mataupu, na faafefe e lenei alii ua lē mafai ona faalauiloa lona suafa ona o le puipuiga o lana fanau teine aemaise le afafine lea na aafia i ana amio lē mafaufau.
O le teineititi lona tolu la lea na ia ta‘ua le mataupu i le mae‘a ai o tausaga o lua o faaauau ia uiga matagā.
O taimi uma na faia ai nei uiga a lea tamā e lei iai le tina o le aiga i lo latou fale ma na ta‘ua e le alii Faamasino o le Faamasinoga Maualuga, le Afioga Vui Clarence Nelson, e matuā leai lava se faasalaga talafeagai i lenei ituaiga solitulafono matuiā se‘i vaganā ai le ave i ai o faasalaga faafalepuipui.
Ta‘ua foi e le alii faamasino o le umi e ave i nei faasalaga e faamautu lava i le itu lea, o le afafine moni lava o lenei alii ua fai i ai lenei uiga leaga ma e tatau ona lagona e nei ituaiga tamā le malosi o le tulai mai a le Faamasinoga e puipui fanau teine e aafia o latou ola ma‘ale‘ale mai i tagata e tatau ona puipuia i latou.
O lea la ua ave ai loa le faasalaga e 15 tausaga ona o le faamaoniga o le toso teine poo le faamalosi teine.
O le a faaopoopo foi i le soloatoa e pei ona ta‘ua o loo ua tuli nei o lea alii.
