E lē sili le ta‘i nai lo le tapuai. Ua tau lau o le faamoemoe sa nofo tapuai ma tatalo ai aiga uo ma ē masani o i latou sa taooto i le taina o a latou tatau faapea foi i malu a tamaitai. Na aofia ia i latou nei ua laei i le malofie a Samoa, le alii pule o le Kamupani malosi tau telefoni le BlueSky Samoa i lona lālā i Niu Sila nei, le Afioga Toleafoa Tiafau Douglas Creevey, faapea le alo ta‘uta‘ua o Samoa sa tautua i le Olopeleki, le susuga ia Eroni Clarke.
O lenei faamoemoe sa faataunuuina i vaiaso e tolu o lenei masina o Setema 2015, ma sa faia ai ma se polokalame tau aoaoga i le tāua o le laei o le alii poo le tamaitai i le malofie a Samoa.
O le Susuga Su‘a Suluape Alaivaa sa nafa ma lea aoaoga i totonu o le vasega a alo ma fanau o loo aoaoina le tāua o le aganuu a Samoa i totonu o le polokalame o le Epipthany Pacific Trust.
O le afiafi o le Aso Toonai na patipatia ai loa le alofa ma le agalelei o le Atua e aiga uo ma ē masani ona ua faaiuina ma le manuia le galuega tele sa alo i ai le afioga i le agaiotupu ia Su‘a Suluape Paul Junior ma le falelua o le aiga Salemalama aemaise ai o le tapuaiga a le meanaitaua ia Sia Suluape.
Na auai le Minisita o tagata atumotu o le Pasefika, Afioga Peseta Sam Lotu Iiga, le Konesula o Samoa, Afioga Faolotoi Reupena Pogi, le Afioga Misa Telefoni, faapea nisi o malo faaaloalogia sa auai.
E silia i le 300 tagata sa tumutumu ai le Pacific Business Trust i Otahuhu e molimau le matagofie o laei o alii ma tamaitai Samoa. O tu ma le aganuu a Samoa e faafeiloai malo i le ava faatupu ma sa galulue ai nisi o alii ma tamaitai aoga o loo aotauina i le aganuu a Samoa i totonu o lenei faalapotopotoga o le Epipthany Pacific Trust.
O le afioga Patele Iosefa Timu sa taitaia le polokalame i le sauniga lotu ma na ia saunoa ai o le aganuu o loo faamalumalu ai i luga le talalelei. O le tatau lea e ta, o le tatau na mafua mai o le meaalofa a le Atua ia Samoa lea ua ta ai le tatau o le talafaasolopito i tino o tagata.
O le faamalosi a Patele ia i latou sa taooto, o le tatau e lē o se mea e talanoa faamaualuga ai, ae o le pe‘a ia iloa ona tautala ai i mātua i le agaga faaaloalo.
Na mae‘a le sauniga ona tuu lea o le avanoa i le agaiotupu ma lana autufuga e faatino ai le galuega i le samaina o pe‘a, ma alo ai loa i saasaaga masani e pei ona iai le aganuu a Samoa.
O le faletua ia Apulu Mary Kalala Autagavaia sa fai ma fofoga o le afiafi. Ae o le valevale alofa ma le titifaitama o mātua na lē tuua ai lo latou limalima lelei ma le loto faimealelei e ala i sauniuniga i seleni ma faalavalava, o palapalamalo na galulue faatasi ai ma le faletua ia Apulu Mary ma le tofa ia Tanoai Reupena Tanoai e tapena ni meaalofa mo le mamalu o le auvalaaulia.
Ma sa autasi foi mātua ma aiga e avea le tofa ia Malaeulu Maiava o se tamā matua e fai ma sui o mātua o fanau nei, e faaleoina le faafetai i le autufuga ma le mamalu o le auvalaaulia faapea Samoa potopoto sa auai.
Na faapea foi ona saunia faaaloaloga mo malo faaaloalogia faapea afioga ia Patele Iosefa Timu sa taitaia le sauniga. Sa faaiu i faafiafiaga a le La o Samoa ma le Operanesian faapea ma le siva afi.
Na saunoa le Afioga Apulu Mary Kalala Autagavaia, e mae‘a lenei faamoemoe ua 20 i latou ua faatoai atu e fia ta ni a latou tatau ma ua iai le manatu o le a ave le faamuamua i tamaiti aoga, ae o le tausaga fou pe a mae‘a le lotu a tamaiti o le a toe faataunuuina ai se isi galuega tele faapenei.
