O se agaga fiafia le vaaia o le faatoateleina o ekalesia ua mafai ona tuufaatasi e ala i le Mafutaga Soofaatasi a susuga i Faafeagaiga i le amata mai Levin e aofia ai vaiaai atoa o Tawa ma Porirua.
Na faatasi uma nei ekalesia i le Aso Sa, 13 o Setema i le itula e 5 i le afiafi ia latou faaevagelia ma viiviiga matagofie o le Atua e fai ma auala e faamafuta ai le tupulaga ma le fanau uma a le Atua. O lenei mafutaga na amataina i le 8 ekalesia peitai o lenei ua 13 i le taimi nei ua faatasi mai.
Sa uluai saunoa faafeiloai le afioga i le Taitaifono ia Rev Perema Leasi i le mamalu o Faafeagaiga ma Fesoasoani faapea ekalesia eseese na auai ona feagai ai loa lea Rev Kini Ulu Kini o le ekalesia Metotisi i Levin ma le taitaia o le sauniga.
O Pastor Sega Tofilau o le ekalesia o le Worship Centre na feagai ma le lauga, ae o sui mai tupulaga o le ekalesia Metotisi Porirua na faitauina le Tusi Paia i le Feagaiga Tuai, a o le sui o tupulaga mai le EFKS Porirua na faitauina le Feagaiga Fou. Manaia foi le suiga ua iai nei ua tuu le avanoa i le fanau e faasoa ai i taimi o sauniga lotu.
E ese foi le leo malie o aufaipese na to va ai vaega o le sauniga mai le ekalesia Metotisi i Tawa, EFKS Ketesemane, Katoliko i Levin ma le ekalesia Metotisi mai Levin. O i latou na feagai ma faaevagelia saunia lelei ma le matagofie, o le ekalesia PIPC i Porirua, EFKS Cannons Creek, Ekalesia Metotisi i Porirua, Penetekoso i Tawa, Metotisi i Cannons Creek, EFKS Porirua, ma le Metotisi i Tawa.
Na tofu lava le faaevagelia ma le feau momoli mai i le aofia i luga o le mataupu na faaautu i ai le Mafutaga o lea po: Tutu faatasi, galulue faatasi ma mafuta faatasi. “Unity.”
Sa faapea foi ona faaiu le mafutaga i le fofoga taumafa na saunia e ekalesia taitasi i lalo o le faamaopoopoga a le ekalesia EFKS i Cannons Creek.
E toatasi foi si faletua na asiasi mai Ausetalia o le faletua o le susuga ia Rev Asuasu Tiotala na faafeiloaia i lea po e le Taitaifono, ma o se tala momoli foi lea i le konitineta tele i lenei mafutaga matagofie.
Momoli atu ai foi le faamalo a le Sooatulau i ekalesia uma na auai i viiga ma faaevagelia aemaise foi le Tofa ia Siliala‘ei, sui o le Siufofoga o le Laumua mai le EFKS i Cannons Creek na feagai ma le pueina o ata o lenei faamoemoe. Faamalo le tautua faamaoni i soo se tiute e viia ai le Atua.
