Ua aulia e le HRPP se isi tausaga ua atoa ai le 36 tausaga talu ona faatu le vaega faaupufai. O nei tausaga e tele ua ausia ai e le HRPP le valu o faigapalota tetele a le atunuu o loo manumalo pea ma tulai i le foe o le pulea o le atunuu.
O le faamoemoe foi lea o loo tulimatai ia latou tapenaga o le palota tele i le tausaga fou, e pei ona saunoa le taitai le afioga i le Palemia, o le tala faa-Aleisa o le shoot the pogati e never say die.
Ua faailoa e Tuilaepa ua 117 sui faatutu o lana pati faaupufai. Ua aofia ai faipule e 37 o loo iai i le paeaiga o iai nei a le Palemene, ae aofia ai foi ma sui tauva tamaitai e toa sefulutasi ma sui o le a tauva tutoatasi e to‘a 42.
O se fuainumera tele lea pe a fua o lea ua toe tolu masina ma vaiaso ona taunuu lea i le aso 4 o Mati 2016 e faia ai le palota. Peitai o loo matala pea le avanoa e pei ona saunoa le taitai o le HRPP, e lei tapunia le faitotoa mo sui e fia tauva i le fu‘a a le HRPP.
Ua tele lipoti ma tala feaveai i le iai o ni feteenaiga i totonu o le HRPP. O le saunoaga a le taitai na ia toe faailoa ai i faipule ma sui lagolago o le vaega faaupufai, le tāua o le tutu faatasi auā na pau lava lea o le auala e mausali ai pea le maopoopoga ma maua ai pea le manumalo e tauaveina le pulega o le atunuu.
O le fono faaletausaga a le vaega faaupufai ia Tesema o le tausaga ua mavae 2014 na ia saunoa ai foi i le tāua o le tutu faatasi, auā o lana saunoaga o se Malo e fevaevaeai ma fefulituaai ona taitai o se Malo e lē tumau.
E iai le talitonuga o le toe faailoa e Tuilaepa o lea vaega tāua ua faamaonia ai faamatalaga tuu mumusu ma tala feaveai i le iai pea o se feteenaiga o loo aafia ai le va o sui o le vaega faaupufai.
O loo laumanu‘ia ai foi ma ni taaviliga o polokiki o loo ta‘ua ai ni taumafaiga a nisi faipule sinia e suia le taitaiga o le vaega faaupufai pe a mae‘a le palota tele o loo loma.
E silia i le to‘a selau i latou na auai i le aso fanau ma le fono faaletausaga a le vaega faaupufai, ma o se numera laitiiti lea pe a fua i isi fono faapea a le faafaletui i tausaga ua mavae. O le faatasiga foi lea na faia ai ma le fiafia a le HRPP mo le Kerisimasi ma le Tausaga Fou, aemaise o se faatasiga e toe faamaopoopo atili ai a latou tapenaga mo le faiga filifiliga a le atunuu poo le palota o le 2016.
