“Ua totogi foi e le mafutaga pili o fanau e to‘a 20 ua aafia o latou aiga i mafatiaga”
Ua savalia nei le fā masina talu ona tuanai atu le afa o Eveni, ae e lē o motusia ai le agalelei o nai o tatou tagata o alala ma aumau i atunuu mamao.
O le mafutaga a faifeau o ekalesia kerisiano eseese o loo galulue ai nisi o lupe faalele a aiga ma nuu faapea lo tatou atunuu i Ueligitone i Niu Sila, ua latou tuufaatasi se fesoasoani ua tuuina atu i aiga e 117 na mafatia i sauaga a le afā o Eveni.
Sa galulue faatasi sui o le mafutaga na malaga mai i Samoa ma le faalapotopotoga o le Toomaga mo e Puapuagatia i le sailia o aiga sa sili ona afaina ma e tatau ma onomea i ai le fesoasoani.
Ua faailoa mai e le Toomaga mo e Puapuagatia, sa latou asia nuu sa matuā mafatia e pei o Lelata, Maagao, Vaisigano, Magiagi, Faatoia, Vaiala, Apia Park, ma Matautu i Apia.
E leai se faamatalaga mai le faalapotopotoga pe sa aofia i le fesoasoani a le mafutaga a faifeau, aiga o nuu i Siumu ma le itumalo o Safata ma Falealili sa ogaoga foi mafatiaga i le afā aemaise o lologa ma tafega.
Pau le faamatalaga mai le faalapotopotoga, e to‘a 20 fanau mai nisi o aiga sa mafatia ua totogi e le mafutaga a faifeau o latou pili aoga, ona ua afaina le itu tau tupe a nai o latou aiga ona o loo saili fesoasoani pea mo le faaleleia o o latou fale aemaise o isi meatotino tāua ma aogā na afaina i tafega. Ua na o le kuata muamua faaleaoaoga ua mae‘a sa totogi ai e le mafutaga o o latou pili.
E lē o faailoaina mai e le Toomaga pe fia le aofai o se seleni na maau i ai le mafutaga, ae o le fesoasoani lenei na mafai ona maua ona o se leitiofoni saili tupe sa faatino e le mafutaga ina ua mae‘a le afā o Eveni ia Tesema 2012. O le maau o le mamalu o tagata Samoa o alala i Ueligitone sa tuufaatasia ma mafai ai ona faatino lea faamoemoe.
Ua mautinoa sa tuuina atu e sui o le mafutaga na malaga i Samoa mo le faatinoina o le fesoasoani ni pepa tala oloa poo vouchers, i aiga sa filifilia ona o aiga ia ua matuā afaina. Sa maua ni lipoti ma ni faamatalaga e lei faamaonia e faapea, e $40,000 le aofai o le maau o le fesoasoani a le mafutaga ua mae‘a ona tufatufa, ma ua faafetaia ai e le Toomaga mo e Puapuagatia le talitonuina e le mafutaga o le faalapotopotoga, e ala i le tuuina atu o le galuega fai faatasi mo le faatinoina o lea faamoemoe tāua.
