Na faatumulia le maota taalo tele o le Whitlam Sport Centre i le faauuga a le aoga o le Kings Leadership College i le vaiaso na tea nei. O le taimi muamua lenei ua fai mai ai i Ausetaia se faauuga a le aoga, ma ua aloaia i lalo o polokalame a le NZ Qualification Authority ma le Australian Qualification Authority.
Sa amatalia le faamoemoe i se taumafataga tele i le afiafi o le Aso Toonai sa faia i le faletaalo o le Whitlam Centre i Liverpool. E 800 tagata valaaulia sa iai i le taumafataga, ma e silia i le 100 volunteers sa galulue mo le tautuaina o le faamoemoe.
O lea taumafataga, sa laulauina lelei e pei lava na faia i fale‘aiga tetele, ma sa faatumulia le maota ma matagofie lona teuteuina. E toatele valaaulia ma taitai iloga o le atunuu sa auai ma molimauina le faamoemoe o le KLC.
Ae o le afiafi o le Aso Sa, sa aloaia ai le faauuga, ma na matuā mataina tapena a le KLC Australia i lea afiafi. I le maitau, e lata i le 2000 tagata o le atunuu sa auai ane, e molimauina le faauuga o tamaiti aoga sa faauu, e 113. O lea fuainumera sa iai ma sui faauu mai Niu Sila, ma sa maofa le aofia ona o le maualuga o sauniuniga a le KLC Australia mo le faamoemoe.
O le lauga autu, sa saunoa i ai le susuga ia Pastor John McMartin, faifeau i Sini o le Inspire Church i Liverpool, o ia foi o le sui o le komiti faafoe a le Australian Christian Churches i Ausetalia, o ia foi o le taitai aoao o le A.C.C. i N.S.W.
O le tatalo faamanuia sa saunoa i ai Ps Semo Pulepule ma faaiuna i se taumafataga māmā, ae sa lē mafai na tumuli ese tagata ona ua mafanafana le alofa ma mataina tapenapena o lea aso.
O le KLC e Peresetene ai le susuga ia Ps Ailaulau Faletutulu ma lona faletua ia Nancy, o faifeau o le Samoan AOG mai Napier Niu Sila. Sa momoli lo la agaga faafetai i sui o le aoga i Sini sa taulamua i tapenaga o le faauuga, Ps Komisi Lealamisa, Ps FilipoTato ma Ps Opeta Tautalafua.
O le aoga a le KLC e aoaoina ai le au kerisiano mai soo se atunuu ma soo se ekalesia, ia saunia mo galuega lelei o le ekalesia a Iesu Kersio. E ono ona lālā, lua i Kalaiesetete, tolu i Sini ma le aoga i le laumua i Napier. O loo iai le manatu e tatalaina nisi aoga i se taimi lata mai i nisi aai o Niu Sila ma setete o Ausetalia.
Faamatalaga na tuuina mai
