Na taitaia lenei sauniga faafetai e le susuga i le Faafeagaiga ia Nove Vailaau ma ia toe faamanatu ai le tele o ona sootaga i le aiga talu tamafanau a lenei aiga na latou aooga faatasi i le Kolisi i Malua ma fesootai ma lupe faalele a le aiga i le tala‘iga o le Talalelei faapea foi le avea o le susuga ia Ailani Tanielu ma le faletua ia Sala ma faifeau o le latou nuu o Vaiala i le tele o tausaga a o tiakono ai ona tuaa.
O le tala o le mafuaaga o lenei lotu faafetai a le aiga sa fetalai i ai le Tofa ia Tulimalefasi Moe Faaea Tanielu-Dick. A o talosaga sa feagai ma le fanau talavou a le aiga.
O le faafetai: Sinapi Tanielu, o le faatoesega: Leitupo Ve‘a Junior, o manaoga: Pauline Sauvao.
Sa faaaogaina lava le Gagana Samoa e le aufai tatalo ona o le agaga ina ia faaolaola pea le gagana Samoa e le fanau ao iai i atunuu ese. O le tausaga muamua lenei ua amata ai lenei vaega i talosaga ua tuuina atu i le fanau, ona o le tele o tausaga ua mavae o i latou matutua lava sa feagai ma talosaga nei.
Sosoo loa ma le upu na timaia ai le aiga e le susuga i le Taitai ia Nove Vailaau, i le autu o le leoleo mamoe lelei e pei ona fai mai le Salamo e 23 ma na ia faafetaia ai foi lenei auga tupulaga o le aiga, ona o loo faaauau pea le mavaega a tuaa ua mavae ina ia ola ia Keriso ma lana amiotonu, aemaise o le sini o le faatasiga, “Ia ave le Talalelei i lou aiga”.
Na mavae le sauniga o le lotu faafetai ona tuumuli atu loa lea i le hall mo le taumafataga faasolo atu ai i le fono faaleaiga ma talanoaina ai le sauni atu mo le lotu faaletausaga i Aukilani i le 2015, o loo nofo faatali mai ai le susuga i le Toeaina Malolo Faaeaina ia Ioritana Laau Tanielu ma le faletua ia Lonise faapea le toatele o le aiga i le aai tele i Aukilani.
E iai le faamoemoe mo le 2017 o le a faailogaina ai le 110 tausaga o le lotu i Samoa o loo iai foi le tele o le aiga o loo tapuai mai ai e pei ona moemiti i ai le tupulaga talavou a le aiga e lei oo i Samoa faapea ma i latou o loo fiafia pea e oo atu ma mafuta ma aiga i le atunuu.
Na ulufale ai le toatele o fanau ma suli o Laau ma Salaalii Tanielu i le Peteli o le EFKS i Porirua i le taeao o le Aso Toonai na tea nei, mo le faamanatuina pea o le lotu faaletausaga e pei ona faamanatuina pea e le aiga i Samoa faapea foi ma Niu Sila nei.
