$100,578.50 foai mo le EKFS Southwest Brisbane

E afua mai mauga manuia o le nuu. A lelei se taitaiga o se lafu mamoe, e fai fiafia foi galuega fai.

O le faaumaina o galuega ma fuafauga faagasolo o lenei tausaga na atofa ai le Aso Toonai muamua o Novema e faia ai le tauvaga tausala a le ekalesia EFKS Southwest Brisbane, e taitasi i le tausaga ma fai. O se sailiga seleni e faaagaga mo galuega fai a le ekalesia a o loo ua mae‘a ona totogi le malu tapuai.

Na tatalaina i le sauniga lotu na saunia e le toeaina Faatonu ia Rev Tauaaga Mataafa ma faagasolo ai le polokalame, o le faifeau foi lea o le aulotu ma le faletua ia Senerita Mataafa.

Na faafeiloaia le auvalaaulia e le fofoga o le ekalesia le afioga ia Muagututi‘a Leka Lilomaiava.

O le fofoga o le aso o le tofa ia Iliolemalae Apulu Asivao Kilipati. Na auai le toatele  ekalesia, na sagisagi fiafia. Na vaaia le lagolago o le ekalesia ma latou tauaaoina ai se seleni e tusa ma le $100,578.50 (selau afe, lima selau fitu valu tala, lima sefulu sene)

Na faafetaia e le fofoga o le ekalesia le aulotu e tusa ai ma le maau ma le milomilosia i le aao foai auā le faiga tausala, e le gata o aiga taitasi, matafale ae faapea nai isi sa auai atu. Se mea lava ina a manaia o uso ae nonofo fealofani.

O se tasi lenei o ekalesia e molimauina pea le galulue fiafia o le toatele o tagata lotu aemaise lana auauna ma le faletua faapea Tina ma Tamā manumalo, e malolo mai tiute folafola ae lē o mapu lo laua fia auai ma foai auā o loo afu pea le tautua i le galuega a le Atua aemaise tagata lautele na foai.