100 taaloga mo le All Blacks

E faamaoni i lana ‘au ma ona uso taaalo, na te faia mea lelei uma mo le jersey,– McCaw

E silia ma le 52,000 tagata na maimoaina le taaloga a le Olopeleki ma Toga i le malae a St James Park i le Aso Sa lea na atoa i ai le selau taaloga faitaulia a le alo o le atunuu mo le Olopeleki lea na manumalo ai i ‘ai e 47-9 a Toga.

Na laasia foi e Nonu le laina sikoa mo nai minute mulimuli o le taloga ma atoa i ai le 30 o ana sikoa faitaulia. O le kapeteni ia Richie McCaw na tauaaoina le pulou tauoloa e faamanatu ai lenei matatia mo le numera sefululua a Niu Sila. Ae peitai o le taaloga aupito finau foi lea a Toga sa latou ausia ai ni osofaiga sosoo (phases) e sefuluiva i lea taaloga.

“O se ta‘utinoga lenei i lou galue malosi i totonu o le ‘au ma lou finau e pei lava ona toe vaaia foi i le taaloga na se‘i mavae atu nei,” o se saunoaga lea a McCaw.

Saunoa McCaw, “O a‘u upu e faamatala ai Maa Nonu o se sui o le Olopeleki ma o se uso. O se tagata e faamaoni i lana ‘au ma ona uso taaalo, e na te faia mea lelei uma mo le jersey ma e na te faia foi mea silisili mo le ta‘uleleia o le ‘au ma nai ona uso nei, ma latou te iloa lelei lou taalo e pei o se siamupini i taaloga uma.”

“O se Samoa Niu Sila e mitamita i lona aiga ma lona atunuu ma ou te momoli atu le faamalo i lau matatia nei. Ia manuia tele lau taumafaiga ua atoa i ai le selau o au taaloga faitaulia mo le Olopeleki.”

O Nonu ua lona 6 ia te ia tama taalo o le Olopeleki ua ausia lenei matatia tāua e pei ona uluai ausia e le alii kapeteni Richie McCaw i se tasi o taaloga o le Ipu a le Lalolagi i le 2011, ae ua lona tolu ai ia te ia alo o Samoa i le Olopeleki ua ausia le 100 taaloga faitaulia, e pei ona uluai laasia e le alo o le atunuu, le alii o Malili (Mils) Muliaina, sosoo ai Kevin Mealamu.

O isi sui o le Olopeleki ua atoa foi le ta‘i 100 o a latou taaloga faitaulia, e pei ona iai Daniel Carter ma Tony Woodcock. Maa Nonu o le lona 1,031 ai lea o tama ua ofu i le togiga iloga a le Olopeleki, ma o le sui lona ono ua atoa le selau taaloga mo le au a Niu Sila e faapei o Dan Carter.

Sa faafetai lenei alo o Samoa i ona mātua ma lona aiga aemaise lana ‘au mo le lagolago malosi ia te ia, ae sa lei faagaloina foi e Nonu lana faamalo i le ‘au a Toga mo le taaloga mataina sa latou faatautino ai i lea afiafi.

I se faatalanoaga i le vaiaso talu ai na saunoa Maa Nonu sa soifua ane lava i Niu Sila e fia taalo mo le Manu Samoa ae peitai ina ua ofi i tauvaga a aoga sa ia taumafai ai loa mo le All Blacks lea ua sapi ai nei.

I se vaaiga faamomoiloto na tauaao ane i ai e ona aiga ula lole matagofie e silasila i ai le lalolagi i le faitama lelei ma le tapuaiga a nai ona aiga Samoa, lea ua iloa uma e le lalolagi le latou lupe faalele.

O Maa Nonu o se alo i ona mātua o Vaka ma Fale Nonu ma na soifua mai lenei alii taalo i le tausaga 1982. Sa uluai taalo mo le au taitoafitu a le New Zealand Sevens mai le 2002 e oo i le 2004, ae na amata taalo i le ‘au tele a lona itumalo o Ueligitone, le Hurricanes i taamilosaga a le Super Rugby mai le 2003 i le 2011.

O le taaloga mulimuli foi lenei a lenei alo o Samoa mo le aulakapi ta‘uta‘ua a Niu Sila le All Blacks, ma pe a mae‘a le taamilosaga o le Ipu a le Lalolagi o loo faagasolo, ona see atu lea o Maa Nonu i Falani, o ina ua saini ai lana konekarate mo le lua tausaga e taalo ai mo le kalapu lakapi a le Toulon.

 Maa Nonu ma lona pulou ma ana ula lole na faailoa ai i le lalolagi le tapuaiga a si ona aiga Samoa Maa Nonu ma ona uso taalo o le All Blacks