10 tausaga tautua Fofoga o le Saolotoga mo Melepone

(Laina i luma) Afioga Taefu Silao, Maanaima Silao ma Luai Tony ma isi tamalii faasalalau o le alaleo
(Laina i luma) Afioga Taefu Silao, Maanaima Silao ma Luai Tony ma isi tamalii faasalalau o le alaleo

Na ofaga potopoto Samoa aemaise o auaunaga a leitio ma a latou paaga i le Aso Toonai, 22 Aukuso 2015, e faafoi faatasi le viiga i le Atua ona o le aulia ma le manuia ai o le 10 tausaga o le tautua matavela a le Siufofoga o le Saolotoga i luga o peau ma galugalu o le ea i totonu o le aai tele o Melepone.

Na saunoa faafeiloai le afioga ia Taefu Siumalae Silao le faatonu o le alaleo i le paia o le auvalaaulia, ma amata ia i le sauniga lotu na taitaia e le susuga ia Pastor Sala Paulo ma ia fofogaina ai le upu faalaeiau mai le Tusi Paia, faatasi ma tatalo na saunoa i ai Pastor Aliiaunoa Fagaloa ma Pastor Apouani Unasa.

O le fofoga o le aso o le susuga ia Ene Laki Nafoi o se tasi o sui faasalalau na saunoa i le gagana faaperetania e faafeiloai sui papalagi ma faagasolo ai ona faiva. O le tootoo autu o le aso o se tasi o sui faasalalau le fetalaiga ia Luai Tony Tuimauga, ma alo ai loa i le taumafataga tele ma faagasolo ai faafiafiaga a ausiva eseese na matagofie naua ai le faamoemoe.

O nisi o malo faaaloalogia na auai atu o Trudy Burke ma Peter White o le Wyn FM, o le alii tusitala mai Samoa le susuga ia Leiataua Mulipola, tina matua ia Lemalu Seepa, sui o le fono faufautua afioga Lemalu Tevaseu, ma le tele o sui mai isi leitio tainane le Aufaigaluega totofi a le Atua ma faletua, aemaise o tupu ma tamalii ma tapaau o le atunuu, a o uo ma paaga, alo le faleupolu i o latou faiva masani ma ta‘ape ai ma le faamanū.

Foai pea le malosi ma le poto ina ia tele pea tausaga e tautua ai mo Samoa. O outou māmā na!