E leai se isi taeao na pito sili ona oo i ai le susuga i le faafeagaiga ia Galumalemana Veni Morisa ma lona faletua ia Annie Morisa faapea le Ekalesia o le Gateway International Ministries, i le taeao o le Aso Sa 3 o Aperila a o alalaga ma fetagisi e siitia le taulaga faafetai i le Atua ona ua mafai ona ausia e le lotu le 10 o tausaga talu ona faavaeina mai i le tausaga e 2006 i le aso 25 o Mati.
O se taeao fou ua toe tu ma vaavaai ai i tua i le lavelave ma le faigata o le galuega sa finau mai ai, ae peitai ana lē seanoa le alofa o le Alii e lē mafai ona folau i lagi e mamā ma le manuia le galuega.
O le alalaga fiafia o le Ekalesia atoa lea e 40 aiga lotu o loo auai na maitauina ai le mamafa o le galue o le Agaga Paia i totonu o le malumalu a o faagasolo le sauniga e le susuga i le faafeagaiga ia Galumalemana Veni Morisa. Ae lē gata i lea o le upu faauuina na saunoa i ai le taitai o le Ekalesia Samoan AOG le susuga le faafeagaiga ia Toaseu Tafunai Muaiava, lea sa ia faamamafaina ai le galulue faatasi o le Ekalesia ma le Atua, “A lē atinae e Ieova le fale e galulue fua i latou, faatasi ai ma le Loto tauivi ma le agaga tauivi i mea lelei na te seleseleina foi le mea lelei.”
O le galue o le upu a le Atua i loto o lana fanau na maitauina ai le gasolo o tagata i luma i le valaau e manaomia se tatalo faapitoa mo latou ma aiga.
Na taualuga le sauniga o le Aso Sa i le pese matagofie a le Ekalesia ma o latou mātua faalegaga e momoli ai o latou alofaaga ma faamanuiaga i le atoa ai o le 10 tausaga o le lotu.
O lenei polokalame na amata mai le po o le Aso Faraile i le taumafataga ma faafiafiaga a le autalavou, mafutaga a tamā ma le mafutaga a tina, ma sa valaaulia ai foi nisi o sui o le lotu faapea nisi o aiga ma uo mai Ausetalia.
O le Aso Toonai na alu ai le tafaoga ma fai ai taaloga e fiafia ai ma mafuta faatasi le aiga o le Atua, ae o le Aso Sa na faaiu ai loa i le sauniga tele lea sa faia i le latou malumalu i Buckland Road i Magele faatasi ai ma le toonai.
