Na faatumulia le nofoaga masani o faatautaia ai aoga mo alo ma fanau laiti i Inala i le vaiaso ua tuanai, i le faamanatuina lea o le sefulu tausaga talu ona amata ma faavaeina mai lenei aoga poo le tautua.
O le faletua ia Ianeta Janene Apulu Tuia (Faleasiu) na amata faatautaia mai lea galuega i le uluai taimi ma faauluulu i ai le aoga faataitai, ona avea lea o ia o se family support worker e fesoasoani ma fai ma sootaga i mātua ma faiaoga i nisi o manaoga.
O se tasi faletua o galulue faatasi e aofia ai Fetai Fitisemanu. O Sinapi Matapula ma Adelle Fitisemanu o i laua nei o loo feagai pea ma le a‘oa‘oina o alo ma fanau laiti.
E ui ina vevesi nisi o aiga atumotu i faafitauli i sauaga i totonu o aiga peitai e faagaeetia le agaga i nei faletua ona o le faigofie o le galuega o loo mamalu ai le puipuiga o le tele o faafitauli e ono tutupu mai.
E to‘a pea ma filemu totonu o lenei faalapotopoga e aunoa ma ni vevesi e lipotia pe faaulu atu ae vaaia pea le faafiafiaina o matuā e lagolago ma auina atu o latou alo e a‘oa‘oina.
O lea galulue faatasi ma le sosoo tau‘au e mafua ona o le gatasi o loto o nai mātua Samoa e lagolago foi nai faletua o si o tatou atunuu o loo tutū mai i lenei matagaluega e fesoasoani i aiga aemaise lava fanau. Ua iai le aoga faataitai a Samoa, Tonga, Rarotonga, lea o loo faauluulu i le faletua ia Ianeta Tupu Tuia, o ia foi o se sooupu i ia atumotu, o Fetai Fitisemanu o loo galue foi i lea matata, o se tasi foi o faiaoga i aso ua mavae. O le tautua a nei faletua e aofia ai uma atumotu o le Pasefika e pei ona ta‘ua i luga, o inā e oo i ai le faasoa ma le tautua o lenei auaunaga.
O se molimau i nai fanau i totonu o aiga le galuega mae‘ae‘a a faiaoga faapea le tautua a le faletua ia Ianeta e fesoasoani ai i le tele o aiga Samoa. E iai faafitauli i nai aiga o mātua ua nofo toatasi na o le tina ma fanau pe o le tamā foi ma fanau o inā la e faapitoa i ai le isi tautua a nei faletua Samoa i soo se fesoasoani.
E ova atu i le afe aiga sa fesoasoani i ai i latou i totonu o le sefulu tausaga, e lē gata i lea, o le tele o nisi o aiga ua maua fale ona o le tele o se fesoasoani a nei Samaria agalelei. E 5 aoga, sa tuufaatasia i le faamanatuina o le sefulu tausaga e aofia ai Carole Park, Richlands East, Inala State, Durak ma Seriveton South sa auai uma i lea aso faapitoa. O le auga lava ina ia maua le fesootaiga a faiaoga ma mātua ma le aoga, e moni ai lava, e faigofie ma māmā le avega pe a pulupululima faatasi. O nisi galuega latou te faia ai foi le aoga suisui.
O le susuga ia John Barnes o se tasi o milionea o inā na auala mai ai se tino i tupe e tusa ma le miliona auā faagaioiga uma mo le manaomia i le tele o tausaga ua mavae.
Sa faatasi ai sui o le Malo ma faia saunoaga autū i le taua tele o lea aso faamanatu, faapea polofesa o le Iunivesite o Grifith aemaise le mamalu o Samoa o loo faaaooga o latou alo i lenei aoga. O le service Manager a le Community service o le tamaitai ia Cherie Lamb.
Na matuai faatumulia i mātua, aiga ma uo o tamaiti o loo i totonu o nei aoga.
Na lē mapu le solo atu o mātua e momoli le agaga faafetai i le faletua ia Ianeta Tuia ma le faletua ia Fetai faapea le ofisa mamalu i le galuega mae‘ae‘a o latou faia pea i aso taitasi ua faatuputupulaia ai le fiafia o nai fanau i le tele o taimi.
