Ua sefulu tausaga e lei toe pa‘i se Tausala Samoa i le pale o le Tausala o le Pasefika, le Miss South Pacific, ae o le afiafi o le Aso Toonai, aso 8 o Tesema, na toe faaea ai e le tamaitai lalelei o Janine Nicky Tuivaiti lona atunuu, ina ua manumalo nei i le pale o le Tausala o le Pasefika i Saute, le Miss South Pacific mo le 2013.
O Janine na soifua ane lava i Aukilani i Niu Sila, ae na agai i Samoa ma auai i le tauvaga o le Miss Samoa i le masina o Setema, ma manumalo ai i le pale e avea ai o ia ma sui o Samoa mo le tauvaga e saili ai le Tausala o le Pasefika i Saute.
Ua lona lima ai nei ia Janine, Tausala o Samoa ua ausia lenei pale o le Pasefika, peitai o Janine le Tausala Samoa muamua ua manumalo i le pale o le Tausala o le Pasefika i se tauvaga ua fai i fafo mai o lona atunuu i Samoa tutoatasi.
O le atunuu tuaoi o Amerika Samoa sa talimalo i le tauvaga o le Miss South Pacific i lenei tausaga, ae o lea ua manumalo nei Honiara i le Atu Solomona, o i latou o le a talimalo mo le isi tauvaga o le Miss South Pacific i le tausaga fou, 2013.
O se tauvaga matagofie ma e mautinoa sa faigata le faiga filifiliga a faamasino, auā e lei iai se teine na alo tamala i ana tapenapenaga i soo se vaega na tausinio i ai. Na matauina i lea afiafi, e fa‘i o le uigaese o le maualuga ua oo i ai tomai o i latou na mamanuina, teuteuina ma tuufaatasia teuga a tamaitai tauva, ae o se tasi lenei tauvaga ua molimauina i le taimi o faatalatalanoga (interviews), e maeu lava le atamamai uma o tamaitai, i le auala sa tali ai a latou fesili, ona o le to‘a, manino le tautala, ae o le loloto o manatu sa tali ai tamaitai uma i fesili.
Ae pei lava o le upu masani a le atunuu, “e lē mua uma ni vaa”. Auā ina ua tuufaatasi togi a alii ma tamaitai faamasino, ona oo ai lea i nisi nei o faaiuga. E tolu isi faailoga na manumalo ai le Miss Samoa, o le tamaitai e sili ona aulelei ona ata, e sili ona manaia lana taleni, ma sili ona matagofie lona laei faaleaganuu. O le laei taele e sili ona manaia ma onomea lona laeiina na manumalo ai le Miss Papua New Guinea, le tamaitai o Ruby-Anne Laufa.
O le tausaga e 1987 na uluai faavae ai e le Malo Samoa lenei tauvaga mo le sailia o se tamaitai lalelei o le Pasefika i Saute, e avea ma tauvaga a lenei itulagi o le Pasefika, e faatāua ma faaauilumaina ai uiga, o tu ma aganuu, o tomai ma taleni eseese e mataulia ai tamaitai talavou o le Pasefika.
E lē gata i lea, o se taimi lelei foi e autasia uma ai tagata o le Pasefika, ae o se avanoa lelei mo atumotu eseese e faalauiloa ai a latou oloa, o tu ma agaifanua, o se auala matagofie mo le faaleleia o le tamaoaiga o atumotu taitasi, aemaise lava i le atunuu o le a talimalo i le tauvaga o lea tausaga.
O Janine o ia o le ulumatua i isi ona uso e toalua, ma a o lei pale mai le Tausala o Samoa seia oo nei ina pale i le Tausala o le Pasefika, o loo aoaoina i le Iunivesite a Aukilani mo le sailia o lana Bachelor conjoint of Law and Arts i lea iunivesite.
Faailoga o le Miss South Pacific 2012
Best Sarong: Miss Papua New Guinea – Ruby-Anne Laufa
Best Talent: Miss Samoa – Janine Nicky Tuivaiti
Best Traditional Wear: Miss Samoa – Janine Nicky Tuivaiti
Miss Internet: Miss American Samoa – Arrielle Maloata
Miss Photogenic: Miss Samoa – Janine Nicky Tuivaiti
Miss Personality: Miss Hawaiian Islands – Joy Saleapaga
National Tourism Award: Miss Papua New Guinea – Ruby-Anne Laufa
Winner: Miss Samoa – Janine Nicky Tuivaiti
1st Runner Up: Miss Cook Islands – Kate Ngatokorua
2nd Runner Up: Miss Fiji – Drue Slatter
3rd Runner Up: Miss Papua New Guinea – Ruby-Anne Laufa
4th Runner Up: Miss American Samoa – Arrielle Maloata
Manumalo Atunuu Tauva Atunuu Talimalo Tausaga Tauvaga
Juliet Spencer American Samoa Samoa 1987
Theresa Purcell Samoa Hawaii Samoa 1988
Reire Cheveaux Tahiti Samoa 1989
Henari Arauvaa Tahiti Cook Islands 1990
Kimiora Vogel Cook Islands Samoa 1991
Julia Toevai Samoa New Zealand Samoa 1992
Leilua Stevenson American Samoa American Samoa 1993
Tarita Brown Cook Islands Samoa 1994
Rochelle Rowena Tuitele American Samoa Tonga 1995
Verona Lovel Tapu Ah Ching Samoa Samoa 1996
Maryjane Moe McKibbin Samoa Samoa 1997
Cheri Robinson Samoa Samoa 1998
Liana Scott Cook Islands Tonga 1999
Helen Afatasi Burke American Samoa American Samoa 2000
Manamea Apelu Samoa Samoa 2001
Lupe Ane Kenape Aumavae American Samoa Cook Islands 2002
Janice Amanavaroa Nicholas Cook Islands Samoa 2003
Sinahemana Hekau Niue American Samoa 2004
Dorothea George Cook Islands Tonga 2005
Krystina Kauvai Cook Islands Samoa 2006
Tessi Leila Toluta’u Tonga Samoa 2007
Vanessa Marsh Niue American Samoa 2008
Merewalesi Nailatikau Fiji Fiji 2009
Joyana Meyer Cook Islands Papua New Guinea 2010
Alisi Rabukawaga Fiji Samoa 2011
Janine Nicky Tuivaiti Samoa American Samoa 2012
