O se miti ua leva ona taulai i ai le vaai, ma se faamoemoega ua loa ona faatalitali i ai ma le onosai, le aoga amata o le Puna o le Atamai i Magele, poo afea a faataunuu ai, a o afea foi a faafeiloaia ai lea manaoga.
O le agai pea i luma ma le faatoateleina o le faitau aofai o fanau o loo saili malo ma saili avanoa i lea aoga, ua faasolo ai ina le gafatia e le nofoaga o loo iai nei le fuainumera o tamaiti.
O le mafuaga lea na toe sasaa ai le fafao, ma toe fetalai ai le tofa ma se faautautaga i le afioga i le tamaitai pule, Tofilau Punipuao Malelega ma le pulega, atoa ai ma le vasega o faiaoga, ina ia toe silasila ma vaavaai atili i se isi nofoaga tele, mo le faamoemoe i se isi mea sili mo le aotauina ai o fanau mo le taimi nei ma agai ai i le lumanai.
O se manaoga sa taumate i le ete, pe faapefea ona faataunuu, peitai sa le nofonofo ai ae sa faalototeleina pea ma faamalosia le pule aoga ma le pulega, i se lagona o le a iai le taimi ma le aso, o le a taunuu ai le miti ua leva ona vaavaai faanenefu i ai mai le tele o tausaga talu ai.
O se saunoaga a se tasi o sui sinia o le aoga sa taua ai, ua tusa ma le sefulu tausaga talu ona faavae le aoga, o le sefulu foi lea o tausaga, talu ona moe miti i se nofoaga fou mo le aoaoina o fanau.
E pei ona taua e lei moemoenoa le pulega, ae sa taumafai loa e saili ma galue agai i le faamoemoe, e ala i le tuuina o se talosaga i le Malo, e auala atu i le Matagaluega o Aoga, mo le fia maua o se seleni e faatino ai le galuega.
E lei talitualimaina e le matagaluega le talosaga sa tuuina i ai, lea ua amata ai nei le galuega fou i lona aofaiga o le tupe e pei ona tusia.
O le faamoemoe o le nofoaga fou ua amata fausia, o le a vaelua pe toe tatala mai i ai le aoga mai lona nofoaga o loo iai nei, ona o le faatupulaia o le fuainumera o fanau o loo aoaoina ai, aemaise foi nisi o loo faatalitali avanoa mo le ulufale.
O se feiloaiga a le Samoa Times ma le tamaitai o Tiana Lolesio, o le pule o lea poloketi a le aoga, sa faailoa mai ai, o le 1.37 miliona tala, o le vaega tupe lava lea mai le ofisa o aoga, ae sa sauni lava foi le Puna o le Atamai, mo le latou seleni na tapena i ai aua o le tasi lea aiaiga o le faamatuu mai o lea vaega tupe tele, mai le Matagaluega o Aoga.
E $50,000 le tupe mai le aoga, sa faaagaga mo le faamoemoe. O le vaega tupe mai le Matagaluega o Aoga, ua maea foi ona tauaaoina i le konekatare kamuta o loo feagai nei ma le fausia o le galuega fou.
O le taeao o le Aso Lua o le vaiaso talu ai, sa faataunuu ai se sauniga o le faapaiaina ma le faamanuiaga faapitoa mai tagata Maori, Kaumatua, mo le laueleele ma le fanua o loo fausia ai le galuega. Sa faatumulia lea aso i matua, uo ma e masani, atoa ai ma tagata valaaulia mo le molimauina o lea faamoemoe. Sa auai foi nisi o sui mai le Matagaluega o Aoga i Aukilani mo lea sauniga faapitoa.
O Me ua faamoemoe e tatau ona mae‘a ai le fausiaina o le galuega, a o le masina o Iulai o le tausaga nei lava ua faamoemoe e tatau ona tatalaina ai loa le nofoaga fou, e pei ona saunoa i ai le pule aoga, le faletua ia Malelega.
O le susuga i faafeagaiga Pastor Steve McRoby, ma Kafareli Sasagi, sa tatalo ma tuuina ifo le maatulimanu o le galuega.
O le afioga i le faletua ia Tofilau Punipuao Malelega, o ia foi o le pule o le aoga, sa tauaaoina ane le maa i lona nofoaga mo le taimi o le sauniga.
O le afioga foi ia Tofilau sa ia toe tauaaoina mealofa e ala i teutusi sa tali ane ai ma le agaga faafetai, mo faafeagaiga sa tauavea vaega uma o le sauniga, ona faaiu ai lea i se taumafataga sa saunia i le nofoaga o le aoga o loo iai nei, i Wickman Way i Magele.
Ua faasilasila faalauaitele mai foi e le tamaitai pule o le aoga, o loo avanoa pea le aoga mo le lesitalaina o fanau e fia auai atu mo lenei tausaga, ma o se mitamitaga foi lea aua o le a faateleina le numera o tamaiti e manaomia, e faatatau i le telē o le nofoaga e pei ona faamoemoe e tatalaina i se taimi lata mai.
