“Ou te tetee i le nonofo i tua o pagota,”…Unasa Mesi Galo

O pagota o loo nonofo i tua i nisi o pou masani ma tuli ai o latou faasalaga seia vagana ua iai ni faaletonu i lo latou le usitaia o aiaiga o le nonofo ai i tua ona toe ave lea e faaauau ona tuli o latou faasalaga i le falepuipui i Tafaigata poo Vaiaata, ua matua tetee lava i ai le Minisita o Faamasinoga, le afioga Unasa Mesi Galo. Na tapa se finagalo o le Minisita ona o se pagota sa nofo i tua i se tasi o leoleo sinia ma tuli ai lona faasalaga na ia faia ni solitulafono o le talepe fale ma ave faagaoi meatotino a nisi o aiga i le afioaga o Faga i Savaii, lea na aafia ai ma le faleoloa o le minisita i le tausaga ua mavae.
Na faaalia e Unasa na fiu lo latou nuu e tau saili poo ai lava le tagata o loo ia faia lea gaioiga le alofa, ma amata lama ai loa e tupulaga o le nuu. O le tasi o po na talepe ai se tasi o fale o se aiga o le nuu lea na tulivae ai ma le tagata talepe fale gaoi, ae maua ane o se tasi o pagota sa nofo i tua i se tasi o Komesina lagolago o le Matagaluega o Leoleo ma Falepuipui i Savaii.
O atugaluga o le alii minisita e le tatau ona toe faia lea polokalame a le matagaluega o leoleo o le ave o nisi o pagota e nonofo i tua ma fai feau a nisi o taitai o le Malo e aofia ai le Minisita o lea matagaluega, aua o le tagata solitulafono lava ia e tatau ona tuli le faasalaga faafalepuipui i le toese. O le nonofo ai foi i tua e mafai ona toe faaosoosoina ai e fai nisi soligatulafono e pei ona saunoa Unasa i le talanoaga ma le tusitala. “O nisi o loo tuli faasalaga o le solitulafono o le fasioti tagata, ma e mafai ona toe fai ai le solitulafono a o nofo i tua”, o le finagalo lea o le minisita.
O nisi o pagota o loo nonofo i Vailele i le mea o iai le maota faalemalo o le Ao Mamalu o le Malo, faapea le maota o le Ao Mamalu i Tuaefu. E tusa ai ma se faamatalaga a se molimau faatuatuaina o nisi o pagota sa nonofo i lea pou masani, na toe faafoi i le falepuipui ina ua faia nisi gaioiga le talafeagai a o nonofo ai i tua. O le pagota foi sa nonofo faatasi ma nisi pagota i le aiga o se tasi o Komesina Lagolago i Savaii lea na maua i Faga, na toe faafoi i le falepuipui ona o lana talepega fale ma ave faagaoi meatotino a aiga ma tagata o lea nuu.
O se tasi o fonotaga a le Palemene i le lua tausaga ua mavae na tali ai le Minisita o le Matagaluega o Leoleo i nisi o faasea faasaga i pagota o loo nonofo i tua i le aiga o le Minisita ma tuli ai faasalaga. O loo manatua na saunoa Toleafoa Apulu Faafisi ma ia taua e faapea, o le taua o lea polokalame o le toe fuataina ai o olaga o alo ma fanau a le atunuu, ma fesoasoani e toe faatonutonu ai o latou mafaufau ina le toe aafia i ni soligatulafono. Peitai o loo molimauina e nisi o pagota o loo nonofo i tua i pou e pei ona faaupuina ai, o loo feagai ma feau a aiga e pei o le faia o maumaga ma faatoaga, ma isi galuega masani. O loo iai le talitonuga o le mafuaaga moni lea e mafua ai ona ave nisi o pagota e nonofo i tua ma tuli ai o latou faasalaga.
“O se faiga le amiotonu lena mea poo se abuse”, na saunoa ai le Minisita o Faamasinoga. O lona manatu e le tatau ma fetaui lea faiga aua e le tatau ona manuia ai se tagata se toatasi, ae ia avane pagota poo i latou o loo nofosala i le falepuipui e fai galuega mo tagata lautele pe afai o se fuafuaga e toe fuataina ai o latou olaga. O le tasi o polokalame faapea o loo faatino e le matagaluega o faamasinoga o tupulaga talavou ua aafia i solitulafono, o loo ave e nonofo i Pulenuu ma faifeau o ekalesia i se taumafaiga e toe fuataina o latou olaga. Pau lea o le polokalame o loo mafai ona faia ai ni faasalaga faapea. E lei mafai ona maua se finagalo o le Minisita ma le Matagaluega o Leoleo i lenei mataupu.