“Moomia se fesoasoani mo si a‘u tama”

E atoa lelei lava lona tino. O lona ulu ua vaaia foi ua malo lelei le atigipoo e pei ona sa iai se popolega e ono afaina ai lenei teineititi ae na taua e lona tina o lea ua sosolo lelei lava. E ‘ai ma le malosi i le fagususu ma talu ona fanau mai e le o iai ni faigata ogaoga ua molimauina i lenei pepe.
Ae a matau atili ona e iloa lea o lona tapuvae o le vae agavale e matua pio mai lava i totonu. O tamailima o lona lima agavale e pipii le tolu ma foliga o si teineititi e ava uma le tele o le vaega i luma.
O aafiaga nei sa taua e le tamaitai o Penina Mavaega o Laulii ma Sataoa, ua tapa ai se fesoasoani a ofisa faasalalau ma nusipepa ina ia mafai ai ona maua nisi e fesoasoani atu i si ana tama aua se taotoga i se taimi lata mai e toe faaleleia ai foliga o Olaivavega – aemaise isi itu o lona tino o loo vaaaia ai faaletonu.
“Ou te le o popole tele i lona vae ma ona lima ona o lea ou te iloa o loo vaivai lava ona ponaivi, ae e pei o foliga lava o si au tama lea ou te alofa i ai, aua o le ava lea e vaaia ai e matua faaeteete gata tele, aua a sao ai siama ma agai sao i lona ulu ona matua faigata lava lea o se isi togafitiga ma o le mafuaaga foi lea o le le saga feaveaia o pepe aua e popole foi lea i le apoia e ia o ni siama”.
O Olaivavega ua atoa nei le masina ma le lua vaiaso le matua. Na fanau i le Maota Gasegase o Tupua Tamasese Meaole i le aso 9 o Setema ma na atoa lelei lava le 9 masina o le maitaga o lona tina, lea foi e faapea mai e lei misi se siaki o lona maitaga, peitai na fanau mai lava ma le iloa e iai le faaletonu “i le ulu o si ana tama”.
“O le latou tala lea ia te au…uma scans e lua e faamaonia lava e iai le faaletonu i lona ulu, ae tei ua fanau mai pepe o ona foliga ma isi vaega o lona tino ia e vaaia ai le faaletonu ae na fai le faata ina ua fanau mai pepe ma maua ai e malosi lava le tata o lona fatu ma e foliga mai o loo malosi lava si teine, sei vagana ai lava ona foliga ia ua moomia ai se fesoasoani”.
O le faamatalaga a le Falemai na tuu i ai le filifiliga i matua pe tuu ai pea le la tama i le falemai pe ave i tua. O le tala a le tina o Penina o le fanau mai o lana tama na fai atu ai fomai ma tausi soifua e leai se faamoemoe e umi le ola o le teineitiiti “ae e mafai ona ave i tua pepe pe a matou mananao i ai ona ailoga e uma aso e lua o ola lava”.
Na filifili le aiga o Olaivavega e ave i tua le latou pepe ma o lea la ua atoa lelei le masina ma nai vaiaso o le teineititi – ua susu fagu ma e malosi foi lana ai ma ua tupu.
“Ou te iloa lava e au o lau tama e mafai ona maua le avanoa e tupu malosi ai pe afai e maua se fesoasoani i se taotoga i se taimi o i luma aua e atoa lelei lava isi vaega o lona tino, na fanau sao lava foi i le atoa ai o le iva masina o lou maitaga. Ua tau mai e le Falemai e moomia le malosi o pepe faatoa mafai ai le taotoga aua e faigata ona o loo laititi ma o le tatalo lena ina ia iai lava se tasi poo nisi e mafai ona maua ai le taotoga o si au tama ua moomia a o lei sao ni siama i lona ulu mai i le ava tele o ona foliga”.
O le lona tolu lea o le fanau a Penina Mavaega ma lona toalua ma o loo nonofo i Laulii. O le faatoaga a le tama o le aiga o loo faamoemoe i ai lenei ulugalii mo le tausiga o le fanau.
E ave le la faleaiga i le maketi i aso uma aua le sailiga o se seleni mo le aiga ma ona pau lea o le alagatupe o loo maua e lea tina ma lona aiga i aso uma. O loo tatala le avanoa mo soo se tasi e iai le manaoga e fesoasoani i lenei teineitiiti.