“E le toe iai se tietie fua e toe talia” – Taitai Malaga Au Taaalo Samoa

O le saunoaga lea a le alii ua ave i ai le faatuatuaga o Samoa na te taitaia le aumalaga tele a au taaalo a le atunuu ua masii atu nei i le Atu Kuki aua tausinioga o Taaloga Laiti o le Pasefika.
O le faafitauli e lei iloa a o lea ua lagalaga mai e le Taitai Malaga o le Au a Samoa mo taaloga laiti nei ona o le “fai soo o le tietie fua”.
Faaalia e Tuala Ollie Ah Him, o tausaga uma lava e  masii ai se au taaalo a Samoa faapea mo tausinioga tetele faavaomalo, e pasese lava isi au taaalo i le lautele o le au a le atunuu ma le faamoemoe i le Malo e tau faalava pasese ma isi manaoga e tatau ona faatautaia ae e lei masii atu mo tausinioga.
“E le toe talia lava e le pulega o taaloga ia ituaiga faiga,” o se tala lea a Tuala Ollie.
E tatau ona 13 au taaalo e malaga ma e tatau ona oo atu i le toa 160 tagata taaalo ma ofisa o taaloga e malaga ae o lea e oo mai lava i le taimi o le a malaga ese atu ai mo le Atu Kuki o loo iai lava au e lei maea ona totogi mai tupe e tatau ona aumai mo le faatinoga o le faigamalaga ma o le suiga ua iai lenei tausaga, e le toe talia lava se tietie fua i taaloga e pei ona masani ai nisi o au a le atunuu”.
O le au aupito toatele i aufili a Samoa ua malaga atu mo lenei faamoemoe, o le au lakapi pa’i ma na ta’ua e sui o lenei au e ta’i $2,300 (tala Samoa) na saili lava e le tama ma le teine taalo latou e totogi agai i sauniga o le faigamalaga lenei ma sa iai foi faaseā i le tele o le tupe ua totogi e le tagata taalo ma le sui o taaloga taitasi e fai ai ma sui o Samoa i faagatama faavaomalo e pei ona iai Taaloga Laiti a le Pasefika i le Atu Kuki.
E ui i lea ona pau lea o le auala na taua e le Pulega o le Au a Samoa, e mafai ai ona ausia le tupe moomia mo le faalava ai o pasese, ma le maua ai o se tupe faaagaga mo au taaalo, poo alauni foi mo au taaalo a o iai i le Atu Kuki.
Na foai foi le Malo ina ia taumafai ai e fesoasoani i le tau atoa o le masii atu o le au a le atunuu ae e le lava, e pei ona taua e le pulega o le au pe a fia malaga uma sui ua fili mai i taaloga eseese.
O nisi o au sa taloina a latou sailigatupe faitele ae o isi na saili lava e le tagata ia lana seleni mo lenei faamoemoe.
O le taeao la o le Aso Tofi (taimi Samoa) na molimauina ai le solo tele a i latou ua mautu le malaga atu i le Atu Kuki mo ia tausinioga ma o le faalaeiau mai i le Alii Palemia, ina ia manatua e au taaalo uma le taua o le igoa o le atunuu o loo o latou tauave ma ia taumafai e tele ni pine e foi mai ma i latou.
“E tele lava au o loo malaga atu i nei taaloga ma le lagona e tatau ona lelei atu le latou taumafaiga nai i lo le tulaga na iai i taaloga o le Pasefika ia na talimalo ai Samoa, e pei o le au lakapi, aua e lei manumalo i le pine auro i le taitoafitu o le 2007, ma o le malaga lenei o le a taumafai ai e foi mai i Samoa nei ma se pine auro.
O le au a le lakapi pa’i lea na manumalo uma alii ma tamaitai i ia tausinioga i le pine auro i Apia, o lea o le a taumafai foi e manumalo i ni pine auro mo Samoa i lenei tausaga, e maualuga lava lo’u manatu e tele ni a tatou pine auro e foi mai ma le au a Samoa lea ua fili mo Taaloga Laiti a le Pasefika”, le taitai malaga, Tuala Ollie Ah Him.
O ‘au ia ua filifilia, e aofia ai le Faipelega, Siisii Uamea Mamafa, Tauvaga Vaa Faila, Faataavale Polo, Ta Polo, Squash, Alo Vaa, Lakapi Pa’i, Lakapi Liki (7), Lakapi  Iuni (7), Kilikiti (Peretania), Afeleti, le Table Tennis ma le Tenisi.
O se tasi lenei o au toatele ua mafai ona masii atu i tausinioga o Taaloga a le Pasefika ma o se taumafaiga ese foi lenei ua le saili tupe tasi le au a le atunuu ae ua sulu lava le au ia e faamautu tupe a ona sui mo lenei taumafaiga.
E leiloa la poo iai se isi na tietie fua po ua taofi lava e le Pulega ona o le leai o se seleni e totogi aua le faigamalaga.
O le Vaalele a le Ea Pasefika na totogi pau e le au a le atunuu mo le faigamalaga tuusao mai i Apia i le Atu Kuki i le faaiuga o le vaiaso.