O le tala faaaopoopo o le tupe a Samoa auā galuega faaopoopo mo le tausaga fou lea ua aofia ai ma le ‘afa miliona tala Samoa mo sauniuniga i le tausaga fou mo le Ipu o le Lalolagi i le faagatama o le Lakapi.
O se tasi lea o auala ua mafai ai e le Iuni Lakapi a Samoa ona maua fesoasoani mo le sauniuni atu ai o le aulakapi a le atunuu i tausinioga o le Ipu o le Lalolagi.
Faaalia e le Alii Ofisa Sili o le Iuni Lakapi, Su‘a Peter Schuster, e $3miliona (tala Samoa) e moomia e le Manu Samoa auā ana sauniuniga mo taaloga o le tausaga fou ma na fesiligia pe aisea ua telē tele ai lea tupe e manaomia, ae o lea na malaga i Falani i le Ipu o le Lalolagi ua mae‘a atu e $2 miliona na manaomia, ae o Falani e mamao ese ma Samoa e lē pei o Niu Sila.
O le faamatalaga a Su‘a Peter, o le tele lava o le seleni o le a faaalu i pasese o tama e malaga mai i isi atunuu mamao aemaise o feoaiga a tama i le faatinoga o le taamilosaga lea o le Ipu o le Lalolagi.
O le taimi lenei ua iai lava le ‘au ua filifilia e unai ai sauniuniga a le atunuu mo le Ipu o le Lalolagi ae na ta‘ua e Su‘a e lē tuua ai le vaavaai ma saga sailiili pea o Samoa e ala i taaloga lakapi ua faatautaia nei mo nisi e manatu e ono filifilia ai se ‘aufili lelei a le atunuu mo taaloga faavaomalo nei.
O le faaaliga a Su‘a, ua iai foi kamupani ua talosagaina e fesoasoani i se tupe mo sauniuniga nei a le Manu Samoa.
O le ogatotonu o le tausaga lea na amata ai taumafaiga a le Malo ina ia maua ni seleni e lagolagoina ai taumafaiga a le Manu Samoa mo le Ipu o le Lalolagi.
Sa faalauiloa e le Kapeneta, se faiga ina ia mafai ai ona faatosina mai kamupani mai fafo e faatutū ai o latou ofisa i Samoa e aunoa ma ni lafoga, pe afai e lagolago i taaloga.
O se faiga faatosina na laga pe na ala ona faatautaia ona o le manaoga e saili se seleni mo taumafaiga a le Manu Samoa mo le Ipu o le Lalolagi.
E oo mai i le taimi nei e lei manino pe ua pasia lea tulaga auā e foliga mai o loo tālia pea poo iai ni kamupani ua faaali lo latou manaoga e faaaogā lea faatosina a le Malo.
O le taimi lenei na ta‘ua e Su‘a o loo iai kamupani ua faaali le lagolagosua i le Iuni Lakapi a Samoa mo nei sauniuniga ae e lei faamautu mai poo ai ia kamupani.
